Արհեստական բջիջ

Ստեղծվել է արհեստական բջիջ, որն ունակ է ֆոտոսինթեզ իրականացնել և սպիտակուցներ սինթեզել:

Կարմիր լույսը խթանում է ֆոտոսինթեզի գործընթացն այս արհեստական բջջում,
 ի վերջո սինթեզվում են ակտինի ֆիլամենտներ:
Աղբյուրը՝ Disease Biophysics Group/Harvard University, The Scientist

Գիտնականները ստեղծել են բջջանման կառույց, որն ունակ է լույսի օգտագործման միջոցով սինթեզել բջջակմախքի ձևավորման համար անհրաժեշտ սպիտակուցներ: Այս արհեստական համակարգի ստեղծման գործընթացում օգտագործվել են բուսական և բակտերիալ ծագման ֆոտոսինթետիկ օրգանոիդներ, որոնք ունակ են կլանել լուսային էներգիան՝ գործընթացին սկիզբ տալու և այն վերահսկելու համար:

Թաղանթի ներսում գտնվում են ակտինի թելիկները,
որոնք բջջակմախքի և հյուսվածքների կառուցվածքային բաղադրիչներ են:
Ակտինի պոլիմերացումը զուգակցվում է արհեստական օրգանոիդների կողմից ԱԵՖ-ի սինթեզի հետ:
Աղբյուրը՝ Disease Biophysics Group/Harvard University, Wyss Institute at Harvard University

Ընտրվել են 2 այսպես կոչված լուսափոխակերպիչներ, որոնք գրադիենտ են ստեղծում թաղանթի 2 կողմերում, խթանելով ռեակցիաների իրականացումը: Բացի այդ դրանք զգայուն են տարբեր լուսային ալիքների՝ մեկը՝ կարմիր, մյուսը՝ կանաչ լույսի նկատմամբ: Այս սպիտակուցները, ԱԵՖ սինթեզող ֆերմենտների հետ միասին մխրճված են լիպիդային թաղանթում: Երբ թաղանթը լուսավորվում է կարմիր լույսով, տեղի են ունենում ֆոտոսինթետիկ ռեակցիաներ, սինթեզվում է ԱԵՖ: Կանաչ լույսի ազդեցությամբ այս գործընթացն ընդհատվում է: Այս երևույթը թույլ է տալիս վերահսկել բազմաթիվ բջջային ռեակցիաներ, այդ թվում՝ ակտինի պոլիմերացումը, որը կառուցողական դեր է կատարում:

Ակտինի արտադրման վերահսկումը գիտնականներին հնարավորություն կտա վերահսկել նաև բջջային թաղանթների ձևը և նախագծել բջիջներ: Այս մոտեցումը կարող է կիրառվել նաև այլ արհեստական օրգանոիդների ստեղծման գործընթացում, ինչպիսիք են արհեստական էնդոպլազմային ցանցը կամ կորիզը: Սա կարող է առաջին քայլը լինել դեպի արհեստական բջջային համակարգեր, որոնք ունակ են նմանակել կենսաբանական բջիջների բարդ վարքագծերը:

Աղբյուրներ՝ The Scientist, Wyss Institute at Harvard University